Banvænir skýstrókar á óvenjulegum tíma

Öflugir skýstrókar gengu í gærkvöldi yfir miðvesturríki Bandaríkjanna með tilheyrandi eyðileggingu. Að minnsta kosti fimm létust en verst var ástandið í Illinois, Kentucky og Indiana. Þá segir á fréttavef BBC að nokkur fjöldi fólks sé enn innilokaður í byggingum sem skemmdust þegar strókarnir gengu yfir.

Þeim fylgdi stundum haglél á stærð við tennisbolta og segja sérfræðingar að um fimmtíu milljónir manna hafi orðið fyrir einhverskonar áhrifum af veðrabriðgðunum sem færa sig nú austar í land. Nóvembermánuður hefur hingað til verið talinn sá mánuður þar sem einna minnstar líkur eru á skýstrókum sem þessum.