Skiptar skoðanir á Óskarskynni

Afhending Óskarsverðlaunanna fór fram í nótt og skiptar skoðanir eru á frammistöðu Seth MacFarlane, aðalkynni kvöldsins. MacFarlane, sem þekktastur er fyrir sjónvarpsþætti sína Family Guy, þótti af mörgum ganga ítrekað yfir strikið, og sérstaklega hefur hann verið gagnrýndur fyrir að ganga of langt í gríni beindu að minnihlutahópum.

Einn af þeim gagnrýnendum er bloggarinn og femínistinn Hildur Lilliendahl, en hún segist hafa gefist upp á útsendingunni.

"Ég held að það vanti fyrst og fremst svolítið mikið upp á að Seth sé meðvitaður um eigin forréttindi," segir Hildur, en hún gafst á endanum upp á útsendingunni. "Hann er hvítur, myndarlegur, ríkur strákur sem hefur heiminn í höndum sér. Mín upplifun er sú að hann sé að níðast á minnihlutahópum í krafti þeirra forréttinda. Hann er samt í hinu stóra samhengi ofboðslega mörgum stigum ofar en allt þetta fólk sem hann er að gera lítið úr. Grín sem að valdastéttir beita niður fyrir sig verður mjög auðveldlega ákaflega andstyggilegt."

Hildur gefur lítið fyrir málflutning þeirra sem telja MacFarlane komast upp með allt vegna þess að hann geri grín að öllum. "Þeir sem beita slíkum rökum væru þá frekar að nota fjölbreytnina í gríninu sem einhvers konar afsökun fyrir því að gera lítið úr minnimáttar. Gera lítið úr hópum sem hafa búið við kerfisbundna kúgun. Það er ekkert þannig að hann eigi að fá að komast upp með að gera lítið úr konun, átröskunum, heimilisofbeldi og öðrum kynþáttum bara út af því að hann er svo rosalega prógressívur og fyndinn og gerir grín að öllum."

Kliður í salnum

Opnunaratriði kynnisins hefur verið gagnrýnt af mörgum á meðan aðrir voru himinlifandi. Kliður myndaðist í sal Dolby-leikhússins, þar sem afhendingin fór fram, þegar MacFarlane sagði brandara um heimilisofbeldi á hendur söngkonunni Rihönnu. Þá var söngatriði kynnisins ýmist hafið upp til skýjanna eða jarðað af netverjum, en þar söng hann um vel valdar leikkonur úti í sal sem sýnt hafa ber brjóst sín í kvikmyndum.

Bandaríski stjörnubloggarinn Perez Hilton er einn af þeim sem gagnrýndu MacFarlane, en hann sagði meðal annars á Twitter að "versti Family Guy-þátturinn væri betri en þetta", og um opnunaratriðið sagði Hilton: "Ég mun aldrei fá þessar sautján mínútur aftur."

"Hæfilega fyrir neðan beltisstað"

Uppistandarinn Þórhallur Þórhallsson fylgdist með verðlaununum og fannst MacFarlane takast nokkuð vel til. "Mér fannst hann bara mjög góður og ekkert fara yfir strikið þannig séð. Maður bjóst auðvitað við því frá þessum manni, en hann var eiginlega stilltari en ég bjóst við," segir Þórhallur, sem tísti nokkuð reglulega um viðburðinn í gærkvöldi. "Ég hef mjög gaman af húmor sem fer aðeins yfir strikið."

Fréttamaðurinn Freyr Gígja Gunnarsson kynnti útsendingu Sjónvarpsins frá verðlaununum og tekur í sama streng og Þórhallur. "Mér fannst hann nokkuð góður. Opnunaratriðið fannst mér flott og vel útfært hjá honum og mér fannst grínið vera svona hæfilega fyrir neðan beltisstað, eins og það á að vera."

Að mati Freys, sem segir kynna undanfarinna ára hafa verið einkar bragðdaufa, fór MacFarlane ekki alvarlega yfir strikið. "Ætli ríkir leikarar í Hollywood eigi það ekki bara skilið einu sinni á ári að fá það svolítið óþvegið?"

Hér má sjá myndband af opnunaratriði Seth MacFarlane