Misþyrmingar í svínabúi náðust á myndband

Tyson Foods, stærsti kjötframleiðandi Bandaríkjanna, hefur slitið samstarfi sínu við svínabú eftir að dýraverndunarsamtökin Mercy For Animals birtu myndband af viðurstyggilegu ofbeldi gegn svínunum. Starfsmaður samtakanna vann á svínabúinu í september og október og tók myndbandið.

Í myndbandinu, sem birt var í síðustu viku, má sjá starfsmenn svínabúsins kýla svínin og sparka í þau, berja þeim utan í steypt gólf, kasta þeim og skilja þau eftir í blóði sínu.

„Við munum ekki umbera þá illu meðferð sem sést í myndbandinu,“ segir Gary Mickelson, talsmaður Tyson Foods, í yfirlýsingu, og segir hann að samningum við svínabúið verði rift þegar í stað og dýrin verði flutt annað.

Eigandi svínabúsins sagði í samtali við NBC-sjónvarpsstöðina að starfsmennirnir sem sjást í myndbandinu hafi verið reknir, en fyrrnefnd dýraverndunarsamtök hafa farið fram á að mennirnir verði kærðir.

Myndbandið má sjá í spilaranum hér fyrir neðan, en rétt er að taka það fram að það sýnir hryllilegt ofbeldi gegn dýrum og er alls ekki fyrir viðkvæma.