Framhald Kony 2012 opinberað í vikunni

Framhald heimildarmyndarinnar Kony 2012 verður opinberað í vikunni. Þetta kemur fram á Facebook-síðu hjálparsamtakanna Invisible Children.

Kony 2012 fór eins og eldur í sinu um veraldarvefinn eftir að hún var opinberuð snemma í síðasta mánuði. Framleiðendur heimildarmyndarinnar hafa nú lokið við gerð framhaldsmyndarinnar. Hún ber heitið „Kony 2012 Part 2."

Upphaflegu myndinni var ætlað að varpa ljósi á voðaverk Josephs Kony en hann er leiðtogi Andspyrnuhers drottins (LRA). Kony er eftirlýstur af Alþjóðastríðsglæpadómstólnum fyrir glæpi gegn mannkyni í Úganda.

Skæruliðasamtökin Andspyrnuher drottins voru stofnuð af Kony fyrir 26 árum. Síðan þá hafa samtökin numið rúmlega 30.000 börn á brott - mörg hver hafa verið neydd til að ganga í raðir samtakanna.

Hægt er að horfa á Kony 2012 hér fyrir ofan. Einnig er hægt að nálgast heimasíðu Invisible Children hér.