Minnast fórnarlamba stríðsins í fyrrum Júgóslavíu

Íbúar í Sarajevo minnast þess þessa dagana að tuttugu ár eru liðin síðan að stríðið í Bosníu-Hersegóviníu hófst. Um var að ræða mestu þjóðernishreinsanir í Evrópu frá Seinni heimsstyrjöld. Stríðið hófst í apríl 1992 þegar Júgóslavía var að liðast í sundur. Um 100 þúsund manns voru drepnir og um helmingur þjóðarinnar neyddist til að yfirgefa heimili sín á fjögurra ára stríðstímabili.

Götur í Sarajevó, þar sem stríðið hófst, eru fullar af stólum. Alls eru þar 11,541 stóll, sem er einn fyrir hvert fórnarlamb í borginni. Fólk hefur sett hvít blóm á sum sætanna. Bangsi, leikföng og skólabækur hafa verið sett á sum smærri sætanna sem tákna börnin sem féllu fyrir hendi serbneskra stríðssveita.