Langvinnt umsátur um fjöldamorðingja - lögreglan leggur til atlögu

Franska lögreglan hefur lagt til atlögu við heimili fjöldamorðingjans Mohamed Merah. Þrjár sprenginar heyrðust fyrir stundu að því er Reuters greinir frá.

Franska lögreglan sat í allan dag um hús manns sem játað hefur að hafa skotið sjö manns til bana í Suður-Frakklandi á rúmri viku. Maðurinn hafði lofað að gefast upp og koma friðsamlega út úr íbúðinni fyrr í kvöld.

Hundruðir lögreglumanna umkringdu fimm hæða íbúðarhús í borginni Toulouse eftir misheppnaða tilraun lögreglu til að brjóta sér leið inn í íbúð mannsins í síðastliðna nótt.

Lögregla fékk upplýsingar um að 24 ára gamall maður sem býr á jarðhæð í húsinu, Mohamed Merah, hafi staðið að baki þremur skotárásum sem kostað hafa þrjú börn og kennara þeirra auk þriggja hermanna lífið.

Til skotbardaga kom þegar lögreglumenn reyndu að brjóta sér leið inn í húsið klukkan þrjú um nóttina. Þrír lögreglumenn særðust í áhlaupinu, og var í kjölfarið ákveðið að hefja umsátur um húsið og koma öðrum íbúum á brott.

Talið var að Merah væri vopnaður hríðskotariffli, sjálfvirkri handvélbyssu og nokkrum skammbyssum. Þá óttaðist lögregla að hann hafi komist yfir handsprengjur. Vélhjól sem Merah notaði við árásirnar fannst í bílskúr við húsið. Þá fundust fleiri vopn í bíl hans.

„Við leggjum allt kapp á að handtaka hann og draga hann fyrir dóm fyrir ódæðið," sagði Claude Gueant, innanríkisráðherra Frakklands. Hann sagði algerlega ónauðsynlegt að taka Merah á lífi.

Saksóknarinn Francois Molins sagði í dag að Merah væri öfgasinnaður múslimi sem héldi því fram að hann hafi fengið þjálfun í vopnaburði í Pakistan og Afganistan.

Hann sagði að Merah hafi fúslega gengist við því í samtali við samningamenn lögreglunnar að hafa myrt fólkið. Hann sagði einnig að Merah héldi því fram að hann tilheyrði Al-Kaída hryðjuverkanetinu, og voðaverkin hafi verið framin til að hefna fyrir dráp á palestínskum börnum.

Merah „sýndi enga iðrun, og virtist aðeins iðrast þess að hafa ekki haft ráðrúm til að myrða fleiri," sagði Molins.

Bróðir Merah og móðir eru í haldi lögreglu, en ekki er gefið upp hvort talið sé að þau hafi vitað af árásunum.

Molins sagði að Merah hafi verið að leggja á ráðin um frekari ódæði, og hafi meðal annars ákveðið að myrða hermann.

Vélhjólið sem Merah notaði við skotárásirnar varð til þess að hann fannst. Hann stal vélhjólinu snemma í mars, en einn af bræðrum hans vakti grunsemdir þegar hann spurði vélhjólaverkstæði hvernig hægt væri að breyta GPS-tæki hjólsins.

brjann@frettabladid.is