Skipulagi kosningabaráttunnar rústað

Allt skipulag kosningabaráttu þeirra Baracks Obama og Mitts Romney fór úr skorðum þegar stormurinn Sandy skall á austurströnd Bandaríkjanna, aðeins viku fyrir forsetakosningar.

Báðir hættu þeir við fyrirhugaða kosningafundi í lykilríkjum, þar sem fylgið getur sveiflast í hvora áttina sem er. Báðir höfðu þeir ætlað að verja síðustu vikunni fyrir kosningar í stíf fundahöld í von um að geta togað til sín fylgi á síðustu metrunum.

Obama hefur notfært sér út í æsar þetta tækifæri, sem hann fær rétt fyrir kosningar, til að sýna hvað í sér býr þegar hætta steðjar að þjóðinni. Standi hann sig ekki nógu vel getur það komið honum í koll á kjördegi.

Romney fær engan veginn jafn mikla athygli og forsetinn, sem ávarpar þjóðina og talar við blaðamenn milli þess sem hann kynnir sér ástandið og talar við yfirmenn almannavarna.

Svo virðist sem bæði Romney og Paul Ryan, varaforsetaefni hans, hafi dregið verulega úr gagnrýni sinni á Obama til þess að ekki líti svo út sem þeir séu að notfæra sér ástandið í pólitískum tilgangi.