Milljónir Saddams taldar ástæðan

Saddam Hussein, fyrrverandi Íraksforseti, hefur verið tengdur við morð á breskri fjölskyldu og frönskum hjólreiðamanni í frönsku Ölpunum í haust.

Saddam er sagður hafa lagt inn 840 þúsund bresk pund, jafngildi rúmlega 170 milljóna íslenskra króna, inn á svissneskan bankareikning í eigu föður verkfræðingsins Saads al-Hilli sem var skotinn til bana á bílastæði ásamt eiginkonu sinni og tengdamóður.

Faðir Saads al-Hilli, Kadhim, hafði verið í nánum tengslum við stjórnmálaflokk Saddams Husseins en hann flúði til Bretlands á áttunda áratug síðustu aldar. Samkvæmt fréttavef breska blaðsins The Guardian, sem vitnar í franska blaðið Le Monde, hefur heimildarmaður innan frönsku lögreglunnar greint frá því að þýska leyniþjónustan hafi rakið slóð fjárins til Íraksforseta.

Á fréttavef The Guardian segir að peningarnir hafi verið lagðir inn á bankareikning í Genf í Sviss sem er í klukkustundar akstursfjarlægð frá staðnum þar sem skotárásin var gerð.

Tvær dætur hjónanna, fjögurra og sjö ára, komust lífs af. Sú yngri faldi sig undir pilsi móður sinnar en sú eldri fékk skotsár í höfuðið.