Valdaránsstjórn hersins lofar lýðræði á ný

Amadou Haya, leiðtogi valdaránsstjórnar hermanna í Malí, hét því í gær að endurreisa stjórnskipan landsins. Um svipað leyti bárust fréttir af því að uppreisnarsveitir túarega hefðu náð borginni Timbúktú á sitt vald.

„Við lofum því hátíðlega að frá og með deginum í dag verður stjórnarskrá lýðveldisins Malí frá 25. febrúar 1992 endurreist, sem og stofnanir lýðveldisins,“ sagði Sanogo í yfirlýsingu sinni.

Þetta er sama stjórnarskráin sem hermennirnir brutu gegn þegar þeir tóku völdin þann 21. mars. Ekki er ljóst hvaða þýðingu þessi yfirlýsing hefur nú strax, þar sem herinn er enn við völd. Ekki fylgdi yfirlýsingunni heldur nein tímaáætlun um kosningar eða aðra endurreisn stjórnskipunarinnar.

Malí hafði verið lýðræðisríki í meira en tvo áratugi þegar hermenn í herstöðinni Kati gerðu uppreisn og réðust í beinu framhaldi inn í forsetahöllina og aðrar valdastofnanir, sem eru í næsta nágrenni herstöðvarinnar í höfuðborginni Bamako.

Þegar hermennirnir réðust á forsetahöllina fór forsetinn, Amadou Toumani Touré, í felur. Aðeins rúmur mánuður var þá til kosninga, sem halda átti 29. apríl. Touré hefði þá verið búinn að gegna forsetaembættinu í tvö kjörtímabil og var því ekki í kjöri, þar sem forseti getur ekki setið lengur samkvæmt stjórnarskrá.

Ástæða uppreisnarinnar var sögð vera sú, að stjórnvöld hefðu ekki séð til þess að herinn hefði nægilegan vopnastyrk til að ráða niðurlögum uppreisnar túarega.

- gb