Kusu uppreisnarmenn til valda

Tveir uppreisnarleiðtogar í þorpinu Wukan í Kína voru kosnir til valda á laugardaginn, fáeinum mánuðum eftir að þeir voru handteknir fyrir að efna til fjölmennra mótmæla í þorpinu.

Þáverandi þorpsyfirvöld voru sökuð um að hafa án heimildar selt landsvæði, sem þorpsbúar höfðu notað til landbúnaðar.

Í desember færðist aukin harka í mótmælin, skemmdir voru unnar á lögreglustöð og bifreiðum. Í kjölfarið voru nokkrir helstu leiðtoganna handteknir, en þá brugðust þorpsbúar við með því að reisa víggirðingar og meinuðu lögreglu aðgang að þorpinu.

Mikil samstaða var meðal þorpsbúa um málið og fór svo að yfirvöld gáfu eftir og efnt var til kosninga.

Í kosningunum höfðu 23 lýst yfir framboði, en kjósendur gátu engu að síður greitt hverjum sem er atkvæði sitt.

Nærri þrír áratugir eru síðan kínverskir ráðamenn heimiluðu frjálsar kosningar til bæjarstjórna, en í reynd hafa áhrif Kommúnistaflokksins oftast ráðið miklu um niðurstöðuna.

Kosningarnar í Wukan nú á laugardag sýna hins vegar að þau áhrif hafa lítil sem engin verið. Þorpsbúar víðar í Kína sjá nú möguleika á að fara að fordæmi Wukanbúa.

- gb