Grikkir meta tjónið og hefja hreinsun

Hátt í hundrað húsa eyðilögðust í óeirðum í Aþenu í fyrrinótt. Fjármálaráðherrar evruríkjanna fagna nýjum niðurskurðaráformum grísku stjórnarinnar, sem fyrir sitt leyti hefur boðað til kosninga í apríl, að fenginni fjárhagsaðstoð.

Þrátt fyrir óeirðir í miðborg Aþenu samþykkti gríska þingið í fyrrakvöld niðurskurðaráform, sem eiga að tryggja ríkissjóðnum fjárhagsaðstoð upp á 130 milljarða evra frá Evrópusambandinu og Alþjóðagjaldeyrissjóðnum.

Reiknað er með því að leiðtogafundur Evrópusambandsins í byrjun mars samþykki fjárveitinguna, rétt í tæka tíð svo gríska ríkið geti borgað næstu stóru afborganirnar af lánum sínum þann 20. mars.

Gríska stjórnin hefur boðað til kosninga í apríl, þegar þessi hrina er um garð gengin og afborganirnar greiddar. „Þessi stjórn á einn og hálfan mánuð eftir,“ sagði Pantelis Kapsis, talsmaður stjórnarinnar. „Við klárum þetta í mars og svo verður kosið í apríl.“

Afgreiðsla gríska þingsins á sunnudagskvöld reyndist þingmönnum erfið og búist var við uppstokkun í stjórninni í gær.

Evran tók svolítinn kipp upp á við á mörkuðum, sem virðast því hafa einhverja trú á að þessar nýjustu ráðstafanir muni duga um sinn til að halda efnahag Grikklands á floti.

Margir hafa þó efasemdir um að niðurskurðaráformin og þessi nýja fjárhagsaðstoð frá ESB og AGS dugi til að hjálpa Grikkjum út úr vandanum. Þeir muni fljótt þurfa á aðstoð aftur að halda.

Landsframleiðsla hefur dregist saman, skatttekjur hafa dregist saman og fjárlagahallinn hefur haldið áfram að vaxa. Hlutfall skulda af vergri landsframleiðslu hefur því ekki lækkað þrátt fyrir alla aðstoðina, og virðist ekki ætla að lækka þrátt fyrir þessa nýju aðstoð.

„Þetta er eins og að pissa í buxurnar, því eftir hálft ár þurfa þeir aftur á aðstoð að halda,“ hefur danska dagblaðið Politiken eftir Tom T. Kristensen, Grikklandsfræðingi við Háskólann í Hróarskeldu.

Fjárhagsaðstoðin er þó ekki endanlega í höfn. Fjármálaráðherrar evrusvæðisins þurfa að staðfesta að gríska ríkið hafi fullnægt skilyrðum þeirra. Þeir hittast í Brussel á miðvikudag.

Samkomulag gríska ríkisins við evrópska einkabanka um eftirgjöf skulda bíður einnig endanlegrar afgreiðslu, en þarf að liggja fyrir nú í vikunni. Þá þarf þýska þingið að samþykkja sitt framlag til aðstoðarinnar, samkvæmt ákvæðum þýsku stjórnarskrárinnar.gudsteinn@frettabladid.is