Falbauð fundi með ráðherrum

Peter Cruddas, einn af gjaldkerum breska íhaldsflokksins, hefur sagt af sér eftir að blaðamenn Sunday Times komu upp um tilraunir hans til að selja auðmönnum aðgengi að David Cameron og George Osbourne, forsætis- og fjármálaráðherrum landsins.

Blaðamennirnir þóttust vera fulltrúar fjárfestingarsjóðs, komu á fundi með Cruddas og tóku upp samtalið. Á upptökunni má heyra gjaldkerann bjóða þeim fundi með Cameron og Osbourne gegn ríflegum framlögum til flokksins, jafnvirði hátt í fimmtíu milljóna króna.

Hann sagði að á slíkum fundum gætu þeir komið athugasemdum á framfæri og þær yrðu hafðar til hliðsjónar við stefnumótunarvinnu ráðherranna.

Þegar Cruddas tilkynnti um afsögn sína á laugardagskvöld sagði hann að honum hefðu orðið á mistök og að orð hans endurspegluðu ekki fjáröflunarleiðir flokksins. Ekki væri hægt að kaupa sér fundi með ráðherrum og því síður að hafa áhrif á stefnuna.

„Það sem gerðist er algjörlega óásættanlegt. Svona öflum við ekki fjár í Íhaldsflokknum,“ sagði David Cameron, og boðaði innanhússrannsókn á málinu. - sh