Vinnuveitendur krefja atvinnuumsækjendur um lykilorð á Facebook

Tveir öldungadeildarþingmenn í Bandaríkjunum krefjast þess að dómsmálaráðherra skeri úr um hvort að vinnuveitendur megi biðja nýja starfsmenn sína um að opna fyrir aðgang að Facebook-prófílum sínum.

Í síðustu viku kom í ljós að nokkur fyrirtæki í Bandaríkjunum hafa beðið atvinnuumsækjendur um að gefa upp aðgangsorð sín að samskiptasíðunni.

Öldungadeildarþingmennirnir Chuck Schumer og Richard Blumenthal hafa nú farið fram á að málið verði rannsakað.

„Á tímum sem þessum - þegar persónuupplýsingar og félags samskipti okkar eru á veraldarvefnum - er nauðsynlegt að tryggja rétt einstaklinga til að halda þessum upplýsingum leyndum," sagði Schumer.

Málið hefur vakið mikla athygli í Bandaríkjunum en það hófst þegar tölfræðingurinn Justin Bassett opinberaði að verðandi vinnuveitandi sinn hafi falast eftir aðgangsorði hans á samskiptasíðunni Facebook.

Atvikið átti sér stað að loknu starfsviðtali en þá sagði viðtalstakandi að hann hefði ekki fundið upplýsingar um Bassett á Facebook - því vildi hann fá lykilorð hans og notendanafn.

Bassett neitaði og dró starfsumsókn sína til baka. Hann greindi síðan frá málinu í viðtali við fréttablaðið The Boston Globe. Síðan þá hefur fjöldi fólks stigið fram og lýst svipaðri reynslu.

Öldungadeildarþingmennirnir hafa nú beðið Eric Holder, dómsmálaráðherra Bandaríkjanna, um að rannsaka málið og skera úr um hvort að fyrirtækin hafi brotið alríkislög með athæfinu.