Einn mesti listafundur allra tíma í Flórens

Vísindamenn og listfræðingar sem leitað hafa árum saman að horfnu málverki eftir Leonardo da Vinci hafa fundið málningarleifar sem eru áþekkar þeim sem meistarinn forni notaðist við.

Málningarleifarnar fundust í vegg í ráðhúsinu í Flórens á Ítalíu, Palazzo Vecchio. Sérfræðingarnir eru sannfærðir um að þar sé goðumlík veggmynd sem da Vinci málaði fyrir 500 árum niðurkomin.

Leonardo málaði veggmyndina árið 1503. Hann var beðinn um að framkvæma myndræna lýsingu á Orrustunni við Anghiari. Samtímamenn fögnuðu verkinu og var hún af mörgum talið ein glæsilegasta veggmynd allra tíma.

Leitin hefur staðið yfir í rúm 35 ár og telja vísindamennirnir sig nú hafa fundið verk da Vincis á bak við risavaxið veggmálverk eftir listamanninn Giorgio Vasari.

Þeir notuðust við agnarsmáar myndavélar og speglunartæki til að gægjast bak við verkið. Það var því mikil ánægja þegar samanburður á málningarleifum sem þeir tóku af veggmyndinni reyndist passa við helstu verk da Vincis - þar á meðal Monu Lisu.

Ef vísindamönnunum tekst að færa sönnur á að veggmyndin sé falin í veggnum þá er fundurinn einn mesti listafundur síðustu 100 ára.