Lyon lagði áhugamennina í Quevilly í úrslitum bikarsins

Lyon varð í kvöld franskur bikarmeistari í knattspyrnu karla eftir 1-0 sigur á 3. deildarliði Quevilly. Þetta er fyrsti titill Lyon-liðsins í fjögur ár.

Argentínski framherjinn Lisandro Lopez skoraði eina mark leiksins af stuttu færi eftir 28. mínútna leik. Sjöfaldir Frakklandsmeistarar Lyon höfðu töluverða yfirburði í leiknum en tókst þó ekki að bæta við marki.

Þetta er í fimmta skipti sem Lyon verður franskur bikarmeistari. Sigurinn bætti upp fyrir tap gegn Marseille í úrslitum deildabikarsins fyrir tveimur vikum.