Færeyingar þurfa að bíða enn lengur

Færeyingar þurfa að bíða lengur en áætlað var eftir því að úrslit fáist í dýrustu olíuborun í sögu eyjanna. Borun holunnar, sem hófst þann 17. júní, átti að taka 4-5 mánuði og vera lokið núna um miðjan nóvember. Statoil hefur nú upplýst að verklokum seinki og að borað verði til áramóta og hugsanlega lengur.

Færeyingurinn Rúni M. Hansen, einn af æðstu yfirmönnum Statoil, segir í viðtali við færeyska útvarpið að í verkefni sem þessu sé ekki auðvelt að gera nákvæmar tímaáætlanir. Holan sé sérlega djúp en borun hennar sé þó langt komin. Meiri tími hafi farið í fóðrun en búist var við og ýmis vinna á borpallinum hafi reynst tímafrekari en til stóð.

Rúni Hansen segir að samningar við undirverktaka hafi verið framlengdir til áramóta en færeyski veturinn geti þó truflað vinnuna á pallinum og seinkað verkinu enn lengur. Hann vill hins vegar ekkert tjá sig um hvort einhver vottur af olíu hafi fundist til þessa.

Borun þessarar fimm kílómetra djúpu holu er dýrasta verkefni í atvinnusögu Færeyja. Kostnaður var áætlaður um 20 milljarðar íslenskra króna en seinkunin veldur því að holan verður enn dýrari. Statoil fer fyrir verkinu með 50% hlut, ExxonMobil á 49% og færeyska félagið Atlantic Petroleum á 1%.

Kínverskur borpallur, Cosl Pioneer, borar holuna en borstaðurinn er um 100 kílómetra suðaustur af Færeyjum. Þar er hafdýpi milli 400 og 500 metrar, en borinn þarf að fara í gegnum hraunlög sem þar liggja djúpt, og spáð var að yrðu erfið.