Fjórar mannskæðar árásir í Sýrlandi

Öflug bílsprengja sprakk skammt frá öryggisbyggingu sýrlensku ríkisstjórnarinnar í borginni Aleppo í gær. Yfirvöld í Sýrlandi segja að hryðjuverkamenn hafi staðið á bak við sprenginguna. Bættu þau við að einn lögreglumaður og einn almennur borgari hafi farist í sprengingunni og þrjátíu til viðbótar hafi særst. Þetta var önnur árásin í landinu á tveimur dögum. Á laugardag fórust 27 manns í þremur sjálfsmorðssprengjuárásum í höfuðborginni Damaskus.

Stjórnvöld segja að árásirnar tengist uppreisninni gegn forsetanum Bashar al-Assad sem hefur staðið yfir í eitt ár. Sýrlenska þjóðarráðið, samtök stjórnarandstæðinga, hafa á móti sakað yfirvöld um að standa á bak við sumar sprengingarnar til að vekja ótta hjá almenningi og sýna fram á að uppreisnarsinnarnir séu hryðjuverkamenn.

Margar sjálfsmorðsárásir hafa verið gerðar í Aleppo og Damaskus, tveimur stærstu borgum Sýrlands, frá því í desember. Mikill stuðningur er við Assad í báðum borgunum. Enginn hefur enn lýst ábyrgð á árásunum um helgina á hendur sér.

Sameinuðu þjóðirnar telja að yfir átta þúsund manns hafi látist í átökunum á þessu eina ári.

Bandarísk yfirvöld telja að Íranar séu að aðstoða sýrlensk stjórnvöld með því að sjá þeim fyrir vopnum í baráttunni við stjórnarandstæðinga. Írakar hafa viðrað áhyggjur sínar við sendiherra Írans í Bagdad vegna málsins. Lítið eftirlit er með lofthelginni yfir Írak og því er auðvelt að flytja vopn frá Íran yfir til Sýrlands. freyr@frettabladid.is