Sama byssan notuð í árásum á hermenn

Talið er að byssan sem notuð var í skotárás í skóla fyrir gyðinga í frönsku borginni Toulouse í morgun hafi verið notuð í tveimur eldri árásum. Sama er að segja um vélhjólið sem árásarmaðurinn notaði en hjólinu og byssunni var stolið fyrir nokkru. Fjórir létust í árásinni í morgun og sautján ára piltur særðist alvarlega.

Fyrr í mánuðinum voru tvær árásir gerðar á franska hermenn og létust þrír í þeim árásum. Í báðum tilvikum var um svipaða aðferð að ræða, árásarmaðurinn ók upp að mönnunum á vélhjóli og hóf skothríð. Frönsk lögregluyfirvöld hafa nú gefið út að um sama skotvopn hafi verið að ræða í öllum tilvikum. Hermennirnir sem skotið var á voru allir af arabískum uppruna og því er talið að kynþáttafordómar séu kveikjan að árásunum.