Sænskur glæpaforingi myrtur

Jörgen Lindskog, foringi vélhjólasamtakanna Outlaws í bænum Ronneby í Suður-Svíþjóð, fannst látinn fyrr í vikunni.

Augljóst var af verksummerkjum að um morð var að ræða og telur lögregla flest benda til þess að morðið tengist skipulagðri glæpastarfsemi, annað hvort átökum milli glæpagengja eða innan Outlaws.

Lindskog, sem var 49 ára gamall og fjögurra barna faðir, átti að mæta fyrir rétt í Karlskrona á þriðjudag, ákærður fyrir hótanir og ofbeldisverk. Hann hefur áður hlotið dóma en þó ekki vegna ofbeldismála.

Lindskog mætti hins vegar ekki fyrir réttinn, en fannst svo látinn sex tímum síðar undir bifreið á þjóðvegi í skóglendi skammt utan við Ronneby. Tvö skotsár voru á hnakka hans, en hann hafði verið látinn í nokkurn tíma þegar vegfarendur urðu hans varir og hringdu á lögreglu.

Aftonbladet í Svíþjóð segir í umfjöllun sinni um málið að Lindskog hafi verið augljóslega taugatrekktur af einhverjum ókunnum sökum. Heimildir blaðsins herma að ummerki á vettvangi hafi bent til þess að um aftöku hafi verið að ræða.

Lögregla útilokar ekki að morðið tengist illdeilum Outlaws við annan klúbb, Red and White Crew að nafni, sem er stuðningsklúbbur Hells Angels í Svíþjóð, en einnig hafa verið átök innan Outlaws upp á síðkastið.- þj