Viðbrögð stjórnvalda vonbrigði

Kofi Annan, sérstakur erindreki Arababandalagsins og Sameinuðu þjóðanna vegna Sýrlands, segir að ef ekki verði tekið á málum þar muni það hafa alvarlegar afleiðingar fyrir öll ríkin í kring. Aðstæðurnar séu flóknari en í Líbíu.

Annan átti símafund með Öryggisráði Sameinuðu þjóðanna í gær. Hann ætlar að senda teymi til Damaskus og reyna að koma á koppinn alþjóðlegri eftirlitsnefnd. Í kjölfarið hyggst hann sjálfur snúa aftur til Sýrlands.

Hann hvatti öryggisráðið til þess að tala einni röddu í málefnum Sýrlands, en Rússar og Kínverjar hafa komið í veg fyrir samþykktir ráðsins gegn Assad Sýrlandsforseta.

Annan sagði að viðbrögð sýrlenskra stjórnvalda hefðu valdið vonbrigðum hingað til.

Tyrknesk yfirvöld hvöttu í gær fólk til að koma sér frá Sýrlandi. Þá verður í næstu viku dregið úr diplómatískum samskiptum Tyrklands við Sýrland. Þá hafa Sádí-Arabía, Kúveit og Barein greint frá því að sendiráðum þeirra í Sýrlandi verði lokað.

Greint var frá því í gær að átök hefðu brotist út í nágrenni Damaskus í gær, í fyrsta skipti í margar vikur. Tugir þúsunda mótmæltu víða um landið eftir föstudagsbænir í gær. - þeb