Chelsea tapaði úrslitaleiknum - Cahill fékk rautt

Rafael Benitez tókst ekki að gera Chelsea að Heimsmeisturum félagsliða í fótbolta því Evrópumeistararnir töpuðu 0-1 á móti Corinthians frá Brasilíu í úrslitaleiknum í Japan.

Paolo Guerrero, fyrrum leikmaður Bayern Munchen, skoraði eina mark leiksins með skalla á 69. mínútu þegar hann var fyrstur að átta sig í teignum eftir að Gary Cahill hafði komist fyrir skot.

Þetta er í annað skiptið sem Corinthians vinnur þennan titil (líka 2000) en jaframt í fyrsta sinn síðan 2006 þar sem fulltrúi Meistaradeildar Evrópu vinnur ekki mótið.

Chelsea pressaði mikið undir lok leiksins og Fernando Torres fékk meðal annars algjört dauðafæri til þess að jafna metin en lét markvörð Corinthians verja frá sér úr opnu færi.

Chelsea-menn létu Brasilíumennina pirra sig á lokakaflanum og Gary Cahill, miðvörður Chelsea, fékk rauða spjaldið á 89. mínútu fyrir að slá til leikmanns Corinthians.

Torres skoraði reyndar mark í uppbótartíma en það var réttilega dæmt af vegna rangstöðu.

Paolo Guerrero var heldur betur hetja brasilíska liðsins í þessari keppni því hann skoraði einnig sigurmarkið í undanúrslitaleiknum á móti Al-Ahly.