Kynferðisbrotamál teygir anga sína til Íhaldsflokksins

David Cameron hefur fyrirskipað rannsókn á því hvernig staðið var að meðferð kynferðisbrotamála sem komu upp á barnaheimili í Wales fyrir nokkrum áratugum síðan.

Cameron tilkynnti þetta þegar hann var á ferð í Abu Dhabi í gær. Ástæðan er sú að þolandi kynferðisofbeldis segir að einn þeirra sem hafi misnotað börnin á barnaheimilinu hafi verið einstaklingur úr Íhaldsflokknum, flokki Camerons. Hann hafi misnotað börnin á áttunda áratug síðustu aldar.

Cameron sagði að barnaníð væri viðurstyggilegur glæpur, að ásakanirnar sem hefðu komið fram væru verulega hrollvekjandi og ekki væri hægt að hundsa þær. Hann ætlaði því að grípa til aðgerða.

Cameron sagðist ætla að fá óháðan aðila til þess að rannsaka málið, hvort upphafleg rannsókn á því hafi farið fram með eðlilegum hætti og rannsakendur unnið starf sitt eðlilega.

Umrædd kynferðisbrot eru sögð hafa átt sér stað á heimili fyrir munaðarlaus börn í Wales á áttunda og níunda áratugnum. Einn þolenda segir að hann hafi verið tekinn af heimilinu og seldur í vændi á nálægu hóteli.

Það var Sky fréttastofan sem greindi frá.