Framdi sjálfsmorð eftir að vera neydd til að giftast nauðgara sínum

Miklar deilur og fjölmiðlaumræða hefur blossað upp í Marokkó í framhaldi af því að aðeins 16 ára gömul stúlka sem var fórnarlamb nauðgunar framdi sjálfsmorð.

Málið hefur einnig vakið töluverða athygli utan Marokkó en stúlkan Amina að nafni var neydd af dómara til þess að giftast manninum sem nauðgaði henni.

Foreldrar Aminu kærðu nauðgunina á síðasta ári en nýlega ákvað dómarinn sem fékk málið inn á sitt borð að í stað þess að nauðgarinn hlyti refsingu skyldi hann giftast Aminu þótt hún væri algerlega mótfallin slíkum ráðahag. Í framhaldinu svipti Amina sig lífi með því að taka inn rottueitur á heimili mannsins sem er tíu árum eldri en hún.

Umræðan í Marokkó snýst einkum um refsilöggjöf landsins sem margir vilja að sé breytt í kjölfar þessa máls. Eins og refsilöggjöfin er í dag getur nauðgari sloppið við refsingu fyrir glæp sinn ef hann giftist fórnarlambi sínu.

Fjöldi slíkra giftinga hefur farið fram að loknum dómsúrskurði en með slíkum ráðahag telja fjölskyldur fórnarlambanna að heiðri fjölskyldunnar sé bjargað.