Ræningjar í New York birta ránsfenginn á Twitter

Tugir manna hafa verið handteknir í New York fyrir að hafa farið ránshendi um verslanir frá því fellibylurinn Sandý reið yfir austurströnd Bandaríkjanna fyrr í þessari viku.

Lögregluyfirvöld í New York segja að hátt í fimmtíu manns hafi verið handteknir fyrir hin ýmsu brot. Þar á meðal voru fjórar konur sem brutust inn í raftækjabúð í Queens. Grunur leikur á að þær hafi verið starfsmenn verslunarinnar.

Þá voru átján handteknir á Coney-eyju í Brooklyn fyrir að hnupla matvörum úr kjörbúð. Þá hafa nokkrir verið teknir höndum fyrir að hafa rænt eldsneyti.

Að sögn borgaryfirvalda í New York hafa nokkrir ræningjar birt skilaboð á samskiptamiðlum þar sem ránsfengnum er hampað. Nokkuð hefur borið á þessu athæfi á Facebook og Twitter. Þá er hafa ránsmennirnir birt skilaboð á Twitter undir merkinu #sandylootcrew.