Costa Allegra leggur að landi á morgun

Farþegar skemmtiferðaskipsins Costa Allegra hafa þurft að þola kæfandi hita og matarskort síðan skipið varð aflvana á Indlandshafi fyrir þremur dögum.

Dráttarbátar draga nú skipið í átt að Seychelles eyjum og er búist við að skipið leggi að landi á morgun. Herskip og flugvélar fylgja skipinu en sjórán eru tíð á svæðinu.

Costa Allegra er í eigu fyrirtækisins Costa Cruises en það sá einnig um rekstur  skemmtiferðaskipsins Costa Concordia sem strandaði undan vesturströnd Ítalíu í janúar með hörmulegum afleiðingum.

Fulltrúar fyrirtækisins munu ganga um borð í Costa Allegra í dag og ræða við farþega og áhöfn skipsins.