Sonur forsætisráðherrans heima þegar lífvörður svipti sig lífi

Sonur Frederiks Reinfeldt, forsætisráðherra Svíþjóðar, var staddur í íbúð forsætisráðherrans þegar lífvörður þar svipti sig lífi um hádegisbil að íslenskum tíma í dag. Samkvæmt sænska Aftonbladet var Reinfeldt sjálfur fjarverandi en sonurinn er nú í skýrslutöku hjá lögreglu þar sem hann er spurður út í atvikið.

„Það er hérna látinn maður. Það er ekkert sem bendir til þess að nokkuð saknæmt hafi átt sér stað. Þetta gæti hafa verið óhapp. Tæknimenn eru núna að rannsaka vettvang," segir Towe Häeg, upplýsingafulltrúi lögreglunnar í Stokkhólmi, við vefútgáfu norska blaðsins VG.

Það var vinnufélagi lífvarðarins sem kom að honum látnum þegar hann var að koma úr hádegismat.