Mikið mannfall eftir sprengingu í Kongó

Að minnsta kosti 150 eru látnir eftir að vopnabyrgi sprakk í loft upp í Brazzaville, höfuðborg Vestur-Kongó. Talið er að um 1.500 hafi slasast í sprengingunni, þar af eru margir alvarlega særðir.

Lögregluyfirvöld og hermenn hafa lokað svæðinu. Enn er mikil sprengihætta á svæðinu og er talið að vopn séu enn að springa. Slökkviliðsmenn eiga því í miklum erfiðleikum með að takast á við eldhafið sem myndaðist í sprengingunni.

Yfirvöld í Vestur-Kongó hafa ekki tjáð sig um hugsanlega ástæðu þess að vopnabyrgið sprakk. Fjöldi húsa í Brazzaville skemmdist, þar meðal hrundi kirkja í kjölfar sprengingarinnar. Fjöldi fólks var í kirkjunni er eftirlifenda nú leitað. Svo öflug var sprengingin að þök á nærliggjandi húsum lyftust af.