Særður björn ógnar öryggi

Lögregla og Náttúruvernd ríkisins í Noregi leita nú að særðu bjarndýri í Saltdal í norðurhluta landsins og hafa beðið almenning á svæðinu að hafa varann á.

Dýrið var skotið á sunnudag eftir að hafa ráðist á sauðfé, en komst undan á flótta.

Bjarnarins er leitað bæði úr lofti með þyrlum og með leitarhundum á jörðu niðri, en var enn ófundinn í gær.

„Björninn gæti hafa komist langt eftir að hann var skotinn og gæti verið hættulegur,“ hefur Aftenposten eftir Margrethe Torseter hjá lögreglunni í Salten.- þj