Hundruð hafa flúið frá Homs

Bæði Hillary Clinton, utanríkisráðherra Bandaríkjanna, og Ban Ki Moon, framkvæmdastjóri Sameinuðu þjóðanna, skora nú á ríki heims að standa saman gegn voðaverkunum í Sýrlandi.

Á sunnudagskvöld fundust tugir líka, þar á meðal nærri fimmtíu lík af börnum og konum, í borginni Homs, þar sem uppreisnarmenn hafa verið öflugir.

Sýrlenskir uppreisnarmenn segja að sum líkanna beri þess merki að fólkið hafi verið brennt lifandi. Sum höfðu verið skorin á háls eða beinbrotin. Uppreisnarmenn kenna stjórnarhernum um þessi voðaverk, en Sýrlandsstjórn sakar uppreisnarmenn um að hafa drepið fólkið til að geta kennt stjórnarhernum um.

Hundruð manna flúðu frá þessum borgarhluta í gær. Nokkur hverfi í borginni eru rústir einar eftir linnulausar árásir stjórnarhersins undanfarnar vikur.

Bæði Kínverjar og Rússar hafa komið í veg fyrir að ályktun gegn sýrlenskum stjórnvöldum næði fram að ganga í öryggisráði Sameinuðu þjóðanna.- gb