Sagði úrslitin koma á óvart

Sósíaldemókratar fengu hreinan þingmeirihluta í kosningum í Slóvakíu um helgina.

Leiðtogi flokksins, Robert Fico, fyrrverandi forsætisráðherra, sagði þessi úrslit hafa komið ánægjulega á óvart.

Fico hefur heitið því að hækka skatt á fyrirtæki og hátekjufólk, en hefur verið gagnrýndur fyrir lýðskrum. Fyrir kosningarnar boðaði hann sterka samsteypustjórn tveggja flokka sem tækist á við efnahagsóvissuna.

Nú er flokkur hans kominn með 83 þingsæti á 150 manna þjóðþingi landsins, en fjögurra flokka hægri stjórnin sem hefur verið við völd fékk 51 þingsæti samanlagt.- gb