Santorum sigraði í báðum prófkjörunum í nótt

Rick Santorum styrkti stöðu sína verulega í nótt í baráttunni um að verða forsetaefni Repúblikanaflokksins.

Rick Santorum sigraði í báðum prófkjörum Repúblikanaflokksins. Í Alabama fékk Santorum 35% atkvæða en þeir Mitt Romney og Newt Gingrich fengu 29% atkvæða hvor.

Mjórra var á mununum í Mississippi þar sem Santorum sigraði með 33% atkvæða en þar fékk Gingrich 31% og Mitt Romney endaði í þriðja sæti með 30% atkvæða.

Santorum sagði þegar úrslitin lágu fyrir í nótt að tími sé kominn til að íhaldssamir kjósendur flokksins standi saman. Ef íhaldsmaður verði valinn forsetaefni flokksins muni hann sigra Barack Obama Bandaríkjaforseta í kosningunum í haust.

Útkoman þykir áfall fyrir Mitt Romney því hún sýnir að hann nær alls ekki eyrum hinna íhaldssamari kjósenda flokksins.

Staða Newt Gingrich versnaði einnig en hann batt töluverðar vonir að sigra í öðru ríkjanna. Gingrich segir hinsvegar að hann muni halda áfram að berjast þar til prófkjörunum lýkur.