Nýtt krabbameinslyf vekur athygli

Vísindamenn við læknisfræðideild háskólans í Stanford í Bandaríkjunum hafa þróað byltingarkennda aðferð við meðferð krabbameins. Rannsóknir þeirra gefa til kynna að hægt að verði að þróa eitt lyf sem barist getur gegn mörgum tegundum krabbameins.

Rannsókn vísindamannanna hverfðist um prótínið CD47 og einstaka virkni þess. Prótínið kemur í veg fyrir að ónæmiskerfið ráðist gegn frumum. Vandamálið er að CD47 er einnig að finna í krabbameinsfrumum, þar af leiðandi tekst sýktum frumum að dafna.

Það var líffræðingurinn Irving Weissman sem stjórnaði rannsókninni. Irving og samstarfsmenn hans komu æxlum fyrir í músum og gáfu þeim síðan lyf sem eyðir CD47 prótíninu. Niðurstöðurnar þóttu merkilegar. Krabbameinið í þeim músum sem fengið höfðu lyfið dreifði sér nær aldrei.

Rannsóknin sýndi einnig fram á að lyfið orsakaði minnkun æxla.

Það eru þó ókostir sem fylgja eyðingu CD47 prótínsins því lyfið hefur einnig áhrif á heilbrigðar frumur. Í rannsóknarniðurstöðum Weissmans kemur fram að fórnarkostnaður sé ekki mikill og að meðhöndlun krabbameins komi ávallt til með að vega þyngra en áhrif meðferðarinnar á heilbrigðar frumur.

Rannsóknarniðurstöðurnar hafa vakið töluverða athygli og hefur Weissman og samstarfsmenn hans fengið 20 milljón dollara fjárveitingu frá heilbrigðisyfirvöldum í Kaliforníu.

Hægt er að nálgast rannsóknargögn Weissmans hér.