Mjög öflugur sólstormur skellur á jörðinni

Mjög öflugur sólstormur mun skella á jörðinni í dag eða snemma í kvöld. Hann gæti valdið ýmsum truflunum en einnig óvenju kraftmiklum Norðurljósum.

Stormur þessi stafar frá risavöxnu sólgosi sem varð á sólunni í fyrradag. Vísindamenn segja að um sé að ræða öflugasta sólstorminn á síðustu fimm árum og að kraftur hans fari vaxandi.

Þegar stormurinn skellur á jörðina í dag eða í kvöld er hætt við að hann valdi ýmsum truflunum á raforkukerfum, GPS staðsetningartækjum og flugferðum. Þá er hætta á að hann skaði stjórntæki gervihnatta á braut um jörðu.

Vísindamenn telja að sólstormurinn geti einnig valdið truflunum á fjarskiptum og væntanlega neyðast flugfélög til að forðast flugferðir yfir bæði Suður- og Norðurpólinn.

Á móti kemur að búast má við kraftmiklum og litríkum Norðurljósum af völdum stormsins ef heiðskírt verður þegar hann skellur á jörðinni.

Geimferðastofnun Bandaríkjanna, NASA, birti myndband af sólgosinu en það má sjá hér fyrir ofan.