Aðdáendur Bieber brjálaðir - Umboðsmaður hans vakti fyrst athygli á laginu

Myndbandið við hið geysivinsæla lag Gangnam Style, með suður-kóreska tónlistarmanninum Psy, varð í gær vinsælasta myndband allra tíma á YouTube.

Árangurinn þykir hreint út sagt ótrúlegur ekki síst fyrir þær sakir að lagið var sett inn á síðuna í júlí síðastliðnum. Frá þeim tíma hefur það verið spilað átta hundruð og fjórtán milljón sinnum á síðunni, sem er mesta áhorf á myndband á síðunni.

Í myndbandinu er gert gys að neysluhyggju í hinu fína Gangnam-hverfi í suður-kóresku höfuðborginni Seoul, en flestir auðugustu íbúar borgarinnar búa þar. Í myndbandinu ferðast hann um borgina á hraðbátum og dýrum sportbílum, dansar meðal annars fræga dansinn á skemmtistöðum fína fólksins og í jógatímum. Með þessu segir Psy að hann vilji vekja athygli á bilinu á milli ríkra og fátækra sem eykst með hverjum deginum.

Lagið hefur farið sigurför um heiminn og náð toppsætinu í tuttugu og átta löndum. Psy, sem er þrjátíu og fjögurra ára, hefur nú gert plötusamning í Bandaríkjunum. Þá hefur hann komið fram á verðlaunahátíð MTV-sjónvarpsstöðvarinnar, kennt söngkonunni Britney Spears dansinn í þættinum Ellen og sungið í X-factor-þáttunum.

Ban Ki Moon, framkvæmdastjóri Sameinuðu þjóðanna, tók meira að segja dansinn með honum í höfuðstöðvum samtakanna í New York á dögunum. Framkvæmdastjórinn sagði á blaðamannafundi að hann vildi vinna með Psy til að vekja athygli á ójöfnuðinum í heiminum.

Og æðið hefur að sjálfsögðu náð hingað til lands því fyrr í þessum mánuði slógu nemendur Hraunvallaskóla í Hafnarfirði Íslandsmet þegar yfir þúsund manns tóku þátt í að dansa Gangnam-Style dansinn.

Söngvarinn Psy, heitir í raun Park Jæ-sang og er þrjátíu og fjögurra ára gamall. Hann er þekktur tónlistarmaður í suður-kóreu og hefur gefið út sex breiðskífur. Árið 2006 giftist hann unnustu sinni til þriggja ára og eiga þau tvíburadætur.

Þar til í gær var það ungstirnið Justin Bieber sem átti mest spilaða lagið á Youtube, "Baby" frá árinu 2010. Aðdáendur söngvarans eru ekki sáttir með að suður-kóreska stjarnan vermi nú fyrsta sætið, og hafa látið reiði sína í ljós í athugasemdarkerfi Youtube.

Aðdáendur Bieber gætu raunar hugsað umboðsmanni hans þegjandi þörfina því hann var fyrsti maðurinn í Bandaríkjunum til þess að setja link á Gangnam Style á Twitter sínu sína, fyrir fjórum mánuðum síðan.