Heimspekingar og vísindamenn munu berjast við ofurtölvurnar

Sérstakur verkefnahópur á vegum Cambridge-háskóla í Bretlandi mun verja hagsmuni mannkyns þegar ofurgreindar tölvur gera uppreisn.

Þetta nýstárlega verkefni á rætur að rekja til Huw Price, prófessor í heimspeki við Cambridge. Hann hefur nú tekið sér sæti í hópnum en það hafa þeir Martin Rees, stjarneðlisfræðingur, og Jann Tallinn, stofnandi Skype, einnig gert.

Hópurinn mun vinna að rannsóknum er varða gervigreind, loftslagsbreytingar og líftækni.

Í fréttatilkynningu sem Cambridge birti á heimasíðu sinni í dag kemur fram að hópurinn muni greina hættur sem koma til með ógna tilvist mannkyns.

„Hvað varðar gervigreind, þá er það sannarlega ekki langsótt hugmynd að ofursnjallar tölvur muni líta dagsins ljós á þessari öld eða næstu. Þannig eru það örlög greindarinnar að losna úr viðjum líffræðinnar," segir Price.

Á þessu augnabliki munu vitsmunir mannsins lúta í lægra haldi fyrir tölvunum. En Price bendir engu að síður á að sem slíkar séu vélar ekki árásargjarnar, hvað þá meinfýsnar. „Samt sem áður er ekki víst hvort að hagsmunir mannkyns fari saman með hagsmunum vélanna."

Gervigreind hefur lengi vel átt sinn stað í hugmyndaheimi vísindaskáldskaparins. Nægir að benda á tölvuna HAL í stórmynd Stanley Kubricks, 2001: A Space Odyssey.

Price viðurkennir að hugmyndir sínar kunni að hljóma fjarstæðukenndar. Hann fullyrðir þó að hættan sé það mikil að ótækt sé að afskrifa hana.

Þessi ógn fellst í auðlindum að mati Price. Þegar vélunum er gefið vald yfir aðföngum munu þær hagræða þeim svo að þær þjóni markmiðum sínum, ekki hagsmunum mannkyns.