Láta Beethoven hefja sig úr fátækrahverfinu

Fátækrahverfin í Nairobi í Kenya eru ekki beinlínis innblásandi staðir þar sem hinar æðri listgreinar ráða ríkjum. Þrátt fyrir það starfar lítil sinfóníusveit í fátækrahverfinu Korigocho. Þar fá munaðarleysingjar og „ræsisrottur" tækifæri til að þjálfa upp færni sem gæti hjálpað þeim að smjúga úr krumlum fátæktarinnar.

Sveitin nefnist Ghetto Classics, en þar fá íbúar hverfisins tækifæri til að kynnast tónlist Brahms og Beethoven. Hljómsveitarmeðlimir æfa á hljóðfæri sem þeir hafa að láni eða fengu gefins og halda tónleika fyrir sína nánustu og aðra íbúa hverfisins.

„En Ghetto Classics snýst ekki bara um fallega tónlist, heldur einnig að gera hljómsveitarmeðlimum kleift að þróa færni og sjálfstraust sem þeir þurfa á að halda til að hefja sig upp úr fátæktinni," segir á fréttavef Aljazeera, en þaðan er myndbandið hér að ofan einnig komið. Þar má sjá hljómsveitarmeðlimi spila lög og segja sögur sínar.