Beðið eftir Sandy: "Þetta verður stór og mikill stormur“

Barack Obama, Bandaríkjaforseti, ávarpaði þjóð sína fyrir stuttu. Hann hvatti íbúa á austurströnd Bandaríkjanna til að vera á varðbergi og ekki vanmeta kraft fellibylsins Sandy.

„Þetta verður stór og mikill stomur," sagði Obama. „Og þegar yfirvöld hvetja ykkur til að flýja, þá eigið þið að flýja."

Þá sagði Obama að eftirköst fellibylsins gætu varað í nokkra daga. Það hafi þó skipt sköpum að yfirvöld í þeim ríkjum sem verða fyrir barðinu á Sandy hafi haft nokkra daga til að undirbúa sig.

Sandy hefur sett kosningabaráttu Mitt Romney, forsetaefnis Repúblikanaflokksins, og Obama úr skorðum. Í ávarpi sínu sagði Obama að kosningabaráttan væri algjört aukaatriði. Mestu máli skipti að tryggja öryggi íbúa á svæðinu og björgunarmanna.