Stórfurðulegt að vera í New York núna

Það er stórfurðulegt að vera í New York núna. Þetta segir Margrét Valdimarsdóttir, íbúi í New York, sem ræddi um fellibylinn Sandy í útvarpsþættinum Reykjavík Síðdegis í dag.

„Það er enginn á götunum. Það er mjög sérstakt fyrir New York borg," sagði Margrét. Öll starfsemi liggur niðri í borginni. Hvorki skólar né samgöngur hafa opnað í dag.

„Hér eru allir að versla sér kerti og vasaljós, vatn og niðursuðudósir," segir Margrét sem sjálf hefur keypt sér sitt af hverju til að vera búin undir storminn. Verslanir eru smátt og smátt að tæmast og brátt verður þeim lokað. Menn gera ráð fyrir því að ástandið verði svipað á morgun.

„Fólk er ekki að taka neina sénsa greinilega. Það ætlar að vera viðbúið," segir Margrét. Hún býst við því að ástandið verði verst á svæðinu í kvöld og í nótt.

„Ennþá er þetta bara smá rok og rigning en það er búist við öllu því versta hérna," segir hún og lýsir því hvernig hægt var að sjá veðrið taka breytingum á einum klukkutíma.

Hér að ofan má nálgast viðtalið við Margréti í heild sinni.