Fjórir Íslandsvinir í landsliðshópi Færeyinga

Karlalandslið Íslands í knattspyrnu mætir Færeyingum í æfingaleik á Laugardalsvelli annað kvöld. Fjórir liðsmenn Færeyinga eru íslenskum knattspyrnuáhugamönnum að góðu kunnir.

Fyrstan ber að nefna Jónas Tór Næs sem nýverið sneri aftur á Hlíðarenda. Næs, sem er hægri bakvörður, lék einnig með Valsmönnum síðastliðið sumar en þá voru þrír Færeyingar á mála hjá liðinu.

Pól Jóhannus Justinussen er einn þeirra en Pól stóð vaktina í vinstri bakverðinum hjá Valsmönnum síðastliðið sumar. Þá spilaði fyrirliðinn Fróði Benjaminsen með Fram á sínum tíma auk þess sem Símun Samuelsen var lykilmaður í liði Keflavíkur frá 2005-2009.

Þjálfari Færeyinga er Daninn Lars Olsen. Olsen var fyrirliði Evrópumeistaraliðs Dana í Svíþjóð 1992 en sneri sér að þjálfun eftir að leikmannaferlinum lauk.

Hann hefur þjálfað lið Randers og Odense en tók við landsliði Færeyja á síðasta ári.

Skærasta stjarna liðsins er líklega markvörðurinn Gunnar Nielsen sem er á mála hjá Englandsmeisturum Manchester City.