Nær útilokað að Bretar verði með lið í Ríó

Alex Horne, framkvæmdastjóri enska knattspyrnusambandsins, segir breskt karlalandslið ekki verða meðal þátttökuþjóða í knattspyrnukeppni Ólympíuleikanna í Ríó árið 2016. Þá segir hann ólíklegt að kvennalandslið verði sent til keppni.

Bretar sendu karlalið til þátttöku í knattspyrnukeppni leikanna í sumar í fyrsta sinn síðan 1960. Konurnar kepptu í fyrsta skipti en sem heimaþjóð fengu landsliðin sjálfkrafa þátttökurétt.

Kvennalið Breta var skipað leikmönnum frá Englandi auk tveggja Skota. Svipað var uppi á teningnum hjá karlaliðinu þar sem fimm Walesverjar auk Englendinga mynduðu landsliðshópinn.

Enska knattspyrnusambandið hefur áhyggjur af því að þátttaka landsliðana í undankeppni Ólympíuleikanna myndi hafa slæmar afleiðingar á landslið Englands, Skotlands, Wales og Norður-Írlands.

„Karlaliðið mun ekki keppa aftur," sagði Horne í viðtali við Times. „Ég met það svo að líkurnar séu litlar á að kvennalið verði sent til keppni af sömu ástæðu."