Lars Lagerbäck: Ísland á að vera meðal 55 efstu þjóða á FIFA-listanum

Landsliðsþjálfari Íslands, Lars Lagerbäck, telur íslenska karlalandsliðið í knattspyrnu eiga að vera meðal 55 efstu þjóða á styrkleikalista FIFA. Þetta kom fram í svörum hans við spurningum lesenda DV.is.

„Ég tel að Ísland eigi innan næstu tveggja ára að vera meðal 55 bestu liða í heiminum. FIFA listinn segir hins vegar aðeins til um hvað hefur gerst í fortíðinni, ekki hvað mun gerast í framtíðinni," svaraði sænski þjálfarinn aðspurður um hvar Ísland eigi heima á styrkleikalista leikmanna miðað við getu leikmanna liðsins.

Lagerbäck var einnig spurður út í það hvort efnilegir íslenskir knattspyrnumenn á aldrinum 16-19 ára væru betur settir í knattspyrnuakademíum erlendis frekar en hér á landi.

„Bæði já og nei. Það fer eftir því hvert þeir eru að fara og hvernig staðið er að þroska þeirra hérlendis. Mín reynsla frá Svíþjóð er sú að þeir leikmenn sem fara utan snemma þurfa að koma aftur heim og hefja ferlið að nýju," svaraði Lagerbäck.