Segir innanríkisráðherra þurfa að virða skipulagsvald Reykjavíkur

Reykjavíkurborg fer með skipulagsvald á flugvallarsvæðinu og það verður innanríkisráðherra að virða eins og aðrir. Þetta segir formaður borgarráðs sem telur að áætlanir um íbúabyggð í Vatnsmýrinni standist og flugvöllurinn verði farinn þaðan árið 2024.

Reykjavíkurborg ætlar að þétta byggð á næstu 18 árum og meðal annars eiga 7 þúsund íbúðir að rísa í Vatnsmýrinni. Innanríkisráðherra sagði í fréttum okkar í gær að útilokað sé að flugvöllurinn fari úr Vatnsmýrinni án samþykkis ríkisins en það eigi landið að mestu. Þá telur hann það óráð að borgin skipuleggi þar íbúðahverfi.

„Innanríkisráðherra er auðvitað frjálst að hafa sína skoðun og við virðum hana en Reykjavíkurborg fer með skipulagsvaldið á svæðinu og það verður ráðherra að virða eins og aðrir," segir Dagur B. Eggertsson, oddviti borgarstjórnarflokks Samfylkingarinnar.

Skoðanakönnun sem gerð var fyrir hálfu ári sýndi að yfir áttatíu prósent landsmanna vilja flugvöllinn áfram í Vatnsmýrinni. Dagur segir það ekki hafa áhrif á áætlanir borgarinnar.

„Þetta hefur nú verið kannað í sérstakri kosningu þar sem meirihlutinn vildi að flugvöllurinn vildi þannig að skoðanir hafa sveiflast í þessu," segir Dagur.

Núgildandi aðalskipulag borgarinnar gerir ráð fyrir að flugvöllurinn verði farinn úr Vatnsmýrinni eftir 12 ár. Drög að breytingum á aðalskipulaginu verða birt í haust. Dagur á þó ekki von á að breyting verði þar á skipulagi í Vatnsmýrinni og að flugbrautum verði fækkað strax eftir 4 ár.

„Þá víkur hann í áföngum á árunum 2016 til 2024," segir Dagur. Þannig að hann verður alveg farinn árið 2024? „Miðað við það, já," svarar hann.