Bert Van Marwijk hættur sem landsliðsþjálfari Hollands

Hollenska knattspyrnusambandið tilkynnti í gærkvöldi að leiðir þess og þjálfarans Bert Van Marwijk hefðu skilið.

Van Marwijk tók við liðinu fyrir undankeppni heimsmeistaramótsins í Suður-Afríku árið 2010. Holland, sem var í riðli með Íslandi í undankeppninni, vann alla sína leiki og fór fullt sjálfstrausts í lokakeppnina í Afríku.

Holland fór alla leið í úrslitaleikinn í keppninni en mátti sætta sig við 1-0 tap gegn Spáni eftir framlengdan leik.

Holland stóð sig aftur afar vel í undankeppni Evrópumótsins í Póllandi og Úkraínu sem nú stendur yfir. Holland tapaði hins vegar óvænt öllum leikjum sínum í riðlakeppninni.

Samningur Van Marwijk við sambandið náði fram yfir Evrópumótið 2016 í Frakklandi. Ekki hefur verið tilkynnt um eftirmann hans.