Arnar Þór og félagar misstu unninn leik niður í tap

Arnar Þór Viðarsson spilaði allan leikinn með Cercle Brugge sem tapaði 3-2 gegn Leuven í belgíska boltanum í dag. Þá var Jón Guðni Fjóluson í liði Beerschot sem tapaði 3-1 gegn Lokeren.

Leikirnir í dag voru umspilsleikir um sæti í Evrópudeildinni. Átta lið leika í tveimur riðlum þar sem efstu tvö liðin leika til úrslita um laust sæti í Evrópudeildinni.

Cercle Brugge komst í 2-0 á útivelli gegn Leuven og þannig stóðu leikar þar til tíu mínútum fyrir leikslok. Þá fengu heimamenn vítaspyrnu auk þess sem gestirnir missstu mann af velli með rautt spjald.

Liðsmenn Leuven minnkuðu muninn úr vítaspyrnunni, gengu á lagið og unnu 3-2 sigur áður en yfir lauk. Þrátt fyrir tapið er Cercle í efsta sæti riðilsins með átta stig og dugar sigur gegn Mechelen í lokaleik riðils síns.

Jón Guðni Fjóluson lék í stöðu miðvarðar hjá Beerschot sem lá 3-1 á útivelli gegn Lokeren. Beerschot er í 3. sæti síns riðils með sex stig og á ekki möguleika á efsta sætinu.