Íslendingar handteknir í óeirðum í Árósum

Fimm af þeim 89 sem voru handteknir í róstunum í Árósum í gær verða leiddir fyrir dómara í dag. Þeir eru sakaðir um ofbeldi í garð lögreglu. Tveir Íslendingar voru meðal hinna handteknu.

Lætin brutust út í gær þegar um 2500 stuðningsmenn fjölmenningarsamfélagsins í Árósum dreif að Möllegarðinum þar sem stóð yfir útifundur um 300 hægri öfgamanna í samtökum sem kalla sig upp á ensku Danish Defence League, eða Danska varnarbandalagið.

Fundurinn snerist um mótmæli gegn múslimavæðingu Evrópu, eins og það var orðað. Samkvæmt lögreglunni á staðnum voru 89 manns handteknir en allir hafa verið látnir lausir nema þeir fimm sem leiða átti fyrir dómara í hádeginu. Allir eru þeir sakaðir um ofbeldi í garð lögregluþjóna, meðal annars að hafa kastað í þá grjóti og flöskum.

Aðeins tveir af þeim 89 sem voru handteknir tilheyra hægri öfgamönnum, en meðal hinna handteknu voru tveir Íslendingar eftir því sem fram kemur á vefsíðu Jyllandsposten. Yfirlögregluþjónninn Bent Preben Nielsen sagði við Jyllands posten að það væri fúlt að hópur kjána hefði með hegðun sinni eyðilagt boðskapinn á friðsömum útifundi.

Tveir lögregluþjónar meiddust í róstunum, einn fékk högg í hnakkann og skarst á höfði en annar fékk flugeld í augað. Hvorugur slasaðist þó alvarlega.