Mitt Romney skoraði þrennu í nótt

Mitt Romney skoraði þrennu í prófkjörum Repúblikanaflokksins í nótt. Hann sigraði í öllum þremur prófkjörunum sem haldin voru, það er í Wisconsin, Maryland og Washingtonborg.

Þessi úrslit eru mikið áfall fyrir Rick Santorum helsta keppinaut hans en pólitískir fréttaskýrendur vestan hafs sögðu fyrir þessi prófkjör að ef Santorum næði ekki að vinna í Wisconsin ætti hann enga raunverulega möguleika á að verða forsetaframbjóðandi flokksins.

Santorum sagði þó í nótt að hann ætlaði að halda baráttu sinni áfram eða að minnsta kosti fram að prófkjörinu í Pennsylvaníu, sem er heimaríki hans, þann 24. apríl.

Romney var sigurreifur í nótt og notaði tækifærið til að hjóla í Barack Obama Bandaríkjaforseta í sigurræðu sinni. Hann sagði að síðustu ár hefðu verið erfiðari en þau hefðu þurft að vera vegna skorts á leiðtogahæfileikum hjá Obama.