Mikil ólga í Grikklandi eftir sjálfsvíg

Mikil ólga er í Grikklandi eftir að 77 ára gamall karlmaður svipti sig lífi fyrir framan þinghúsið í Aþenu, höfuðborg Grikklands, en hann á að hafa skilið eftir sjálfsmorðsbréf þar sem hann sakaði ríkisstjórnina um að hafa svipt sig öllum lífeyri, því hefði hann gripið til þessa örvæntingarráðs.

Fjöldi mótmælenda komu saman í gærkvöldi vegna sjálfsmorðsins. Mótmælin leystust síðar upp í óeirðir. Þannig köstuðu mótmælendur bensínssprengjum í áttina að lögreglu sem svaraði með því að að skjóta táragasi.

Maðurinn sem svipti sig lífi er sagður hafa rekið apótek í áraraðir. Hann lætur eftir sig eiginkonu og dóttur. Fjöldi Grikkja hafa lagt leið sína að torginu þar sem hann svipti sig lífi og skilið eftir blóm. Reuters greinir svo frá því að sjálfsmorðstíðni í Grikklandi hafi aukist um 18 prósent árið 2010.