Láta krossfesta sig á Filippseyjum

Heittrúaðir kaþólikkar á Filippseyjum láta krossfesta sig í dag til þess að minnast pínu krists. Kaþólska kirkjan fordæmir athæfi þeirra en ferðamenn hafa flykkst að landinu til þess að verða vitni að því sem þarna fer fram.

Í sumum tilfellum neita menn því að taka verkjastillandi lyf til þess að gera athöfnina bærilegri. AFP fréttastofan ræddi við Alex Laranang sem segist hafa látið krossfesta sig á hverju ári síðastliðin 12 ár. „Ég vænti þess ekki að fá þetta endurgoldið á neinn hátt. Ég trúi á guð og ég mun gera þetta þangað til ég læt lífið," segir hann.

Ekki er vitað með vissu hversu margir láta krossfesta sig á Filippseyjum, en þó er vitað að í bænum San Fernando eru um 20 manns sem gera þetta í ár.