Munu skjóta niður eldflaug Norður-Kóreu

Stjórnvöld í Japan ákváðu í dag að ef eldflaug sem Norður-Kóreumenn ætla að skjóta á loft í næsta mánuði ógni landinu, þá verði hún skotin niður umsvifalaust.

Yfirvöld í Norður-Kóreu halda því fram að vísindalegar forsendur séu fyrir eldflaugaskotinu og að eldflauginni sé ætlað að koma gervitungli á sporbraut um jörðu.

Grunur leikur á að eldflaugaskotið sé liður í þróun langdrægra flugskeyta.

Fyrr í vikunni tilkynnti varnarmálaráðherra Japan, Naoki Tanaka, að eldflaugavarnarkerfi landsins væri í viðbragðsstöðu vegna eldflaugaskotsins.

Nýlegar gervitunglamyndir sýna að vísindamenn Norður-Kóreu séu farnir að undirbúa skotið en talið er það muni eiga sér stað um miðbik næsta mánaðar.