Orðrómur um valdarán í Kína - sex handteknir og endurmenntaðir

Sex einstaklingar hafa verið handteknir í Kína auk þess sem yfirvöld þar í landi hafa lokað sextán netsíðum vegna orðróms um yfirvofandi valdarán í Kína. Þannig greindu vefsíðurnar frá faratækjum frá hernum á götum Peking.

Samkvæmt breska ríkisútvarpinu er líkleg ástæða fyrir þessum harkalegu viðbrögðum yfirvalda yfirvofandi stjórnarskipti innan kommúnistaflokksins, sem hefur ekki gerst í áratugi.

BBC segir frá því að sérstök stofnun, sem hefur eftirlit með internetinu í Kína, hafi sagt að orðrómurinn hefði slæm áhrif á almenning, því hefði verið brugðið á það ráð að loka umræddum síðum og handtaka fólkið. Þá segir stofnunin einnig að hinir handteknu hefðu verið endurmenntaðir, án þess að það sé útskýrt nánar.

Stjórnmálaskýrandi BBC telur viðbrögðin til komin vegna yfirvofandi stjórnmálabreytinga innan kommúnistaflokksins þar í landi, en hart er barist á bak við tjöldin um helstu embætti flokksins.